Fleire kvinnelag reagerer på at utøvarar utnyttar BH-storleiken for å sykle raskare. No tek sykkelforbundet grep før tysdagens etappe i Tour de France.

Fleire kvinnelag reagerer på at utøvarar utnyttar BH-storleiken for å sykle raskare. No tek sykkelforbundet grep før tysdagens etappe i Tour de France. BH-TRIKSET: Fleire sykkellag meiner større sports-BH kan gi kvinnelege ryttarar ein fordel i kampen om sekunda. Sykling i vindtunnel, spesialdrakter og meir aerodynamiske hjelmar er i dag kvardagskost for proffane. Trikset handlar i all si enkelheit om å jamne ut forma på overkroppen. Når utøvaren sit framoverbøygd på temposykkelen, vil ein polstra eller større BH fylle tomrommet på brystet og styre lufta betre rundt kroppen. – Vi snakkar om at ein endrar luftstraumen rundt kroppen, slik at ein får mindre overtrykk på låra, forklarar Bert Blocken, professor i aerodynamikk, til det internasjonale sykkelmediet WielerFlits. Den belgiske professoren har utført omfattande forsking på nettopp denne metoden. Hans resultat viser at det er mogleg å oppnå ein reduksjon i luftmotstanden på opptil 3,6 prosent dersom ein bruker ein gjenstand med den mest optimale forma over brystet. – Det er ikkje slik at ein får ein fordel på titals sekund på dette i ein tempoetappe, men på ein tur på 20 til 30 kilometer kan det gi sekund som kan vere avgjerande, fortel Blocken. – Det er nok ikkje forskjell på første- og 50. plass, men det kan vere den tiandedelen eller det sekundet viss du kjempar i toppen i samandraget eller kjempar om etappesiger. Då kan det vere avgjerande, seier Øivind Lukkedal, som var NRKs sykkelekspert under Tour de France for herrar.